Tá tweet i nGaeilge foilsithe ag ceann de na foirne sacair is clúití san Eoraip tar éis d’ionadaithe sacair as Éirinn a bheith ar cuairt acu ar na mallaibh.
“Ba mhór an pléisiúr é sibh a bheith anseo. Tá súil againn gur bhain sibh sult as an am a chaith sibh linn!”, ba é sin an teachtaireacht a foilsíodh ar chuntas X de chuid Athletic Bilbao, mórfhoireann sacair as Tír na mBascach atá ar an fhód le 125 bliana.
🇮🇪 Representatives of @FAIreland and several @LeagueOfIreland clubs visited Bilbao to learn about #ACFundazioa‘s work in our local communities.
🤝 Ba mhór an pléisiúr é sibh a bheith anseo. Tá súil againn gur bhain sibh sult as an am a chaith sibh linn!#AthleticClub 🦁 pic.twitter.com/utYooUyaKH
— Athletic Club (@Athletic_en) October 17, 2023
Bhí toscaireacht ó Chumann Peile na hÉireann (FAI) agus ó Shraith na hÉireann in Bilbo chun foghlaim faoin Fundazioa atá ag an chlub, funadóireacht speisialta a bunaíodh breis agus 20 bliain ó shin chun cuidiú leis an tsochaí i gcoitinne tríd an spórt.
Bhí Liam Brady ar an toscaireacht mar aon le daoine aitheanta eile ó shaol an tsacair in Éirinn.
Tá stair fhada idir Athletic Bilbao agus Éire agus i mí Lúnasa tháinig siad go Baile Átha Cliath le himirt in aghaidh Manchester United i gcluiche réamhshéasúir.
Murab ionann agus formhór na bpríomhchlubanna, is leis an lucht tacaíochta féin an club agus ó 1912 i leith tá cur chuige acu atá go hiomlán uathúil sa sacar: is sacardóirí as Tír na mBascach, nó sacardóirí a fuair oiliúint sa tír, agus iadsan amháin, a imríonn dóibh.
Ciallaíonn an polasaí seo go gcuirtear an-bhéim ar oiliúint imreoirí óga áitiúla, rud a théann chun tairbhe go mór do chur chun cinn an spóirt ar fud Thír na mBascach.
Tá polasaí an-dearfach acu fosta i leith na Bascaise, a úsáidtear, chomh maith leis an Spáinnis, sa mhargaíocht ar fad a dhéanann an club.
Aupa Athletic!
