Tá an chéad seachtain den Chorn Domhanda Rugbaí beagnach thart agus d’fhéadfá rá gur seachtain den scoth a bhí ann. Tá cluiche amháin ar a laghad imeartha ag gach foireann faoin am seo, agus cúpla foireann tar éis dhá chluiche a imirt laistigh de cúig lá.
Is dúshlán ollmhór é an Corn Domhanda ó thaobh sláinte na n-imreoirí. Tá beirt ón Albain, Price agus Watson, ag filleadh abhaile cheana féin tar éis cluiche amháin a imirt. Beidh an Albain ag imirt in aghaidh Shamó sula mbeidh orthu dhá chluiche a imirt laistigh de chúig lá.
D’imir an Rúis dhá chluiche cheana féin. Thosaigh siad a bhfeachtas ar an Aoine agus d’imir siad arís ar an Máirt. Le bheith macánta faoi, níl foireann den scoth acu agus mar gheall ar an easpa ama a bhí acu idir na cluichí, bhí siad traochta. Mar thoradh air sin, chaill siad. Nílim ag maíomh nach raibh Samó go maith, ach ní raibh an dúshlán céanna rompu agus a bhí roimh an tSeapáin nuair a d’imir siadsan in aghaidh na Rúiseach Dé hAoine.
D’imir Sasana dhá chluiche laistigh de cúig lá freisin, ach dúshlán iomlán difriúil a bhí rompu. Níl ach cúigear a thosaigh sa dá chluiche Shasanacha. D’imir foireann iomlán na Rúise faoi dhó. Tá doimhneacht foirne agus acmhainní ag na Sasanaigh nach bhfuil ag na Rúisigh, agus níl na deacrachtaí céanna ag an dá fhoireann. Tá Sasana ag cuardach coirn — beidh an Rús sásta le bua amháin.
D’imir Fidsí dhá chluiche laistigh de chúig lá freisin, ceann in aghaidh na hAstráile agus ceann in aghaidh Uragua. Rinne siad a ndícheall in aghaidh na hAstráile, ach chaill siad. Agus mar gheall ar an easpa sosa a bhí acu, bhí siad tuirseach in aghaidh Uragua, agus chaill siad arís.
Thuill Uragua an bua. D’imir siad le paisin agus le bród. Rinne siad na cinntí cearta ar an bpáirc agus bhí cosaint fhíochmhar acu. Nílim ach ag rá go raibh tuirse ar fhir Fhidsí. Teastaíonn míorúilt d’Fhidsí anois chun na cluichí ceathrú ceannais a bhaint amach.
Ach níl clár ama dúshlánach ag gach foireann. B’fhéidir go raibh dhá chluiche laistigh de chúig lá ag Fidsí, ach níl ach cluiche gach deireadh seachtaine ag Tonga. Tá sos ag an Nua-Shéalainn freisin sula gcaithfidh siad dhá chluiche a imirt laistigh de chúig lá. Ach sa ghrúpa ina bhfuil siad, agus leis an mbua a bhí acu in aghaidh na hAfraice Theas, beidh siad ar a sháimhín só.
D’imir Éire in aghaidh na hAlbain ag an deireadh seachtaine, agus beidh sos seachtaine acu roimh an gcéad chluiche eile in aghaidh na Seapáine. Cinnte, beidh orthu imirt in aghaidh na Rúise cúig lá ina dhiaidh sin, ach mar a luaigh mé cheanna, tá 15 imreoir théis dhá chluiche a thosú don Rúis cheanna féin. Ní bheidh an cúige dhuine déag céanna á n-úsáid ag Schmidt go dtí na babhtaí ceannais. Ní hamháin sin, ach beidh ocht lá ag an hÉireannaigh sula n-imreoidh siad an cluiche deireanach den ghrúpa.
Is í doimhneacht foirne an rud is tábhachtaí chun an Corn Domhanda a bhuachan, níl argóint ar bith ann faoi sin. Teastaíonn dhá fhoireann iomlán uait chun a bheith cinnte nach bhfuil éinne traochta roimh na babhtaí ceannais.
Ach teastaíonn beagáinín áidh uait freisin ó thaobh an chláir ama de.
Is foireann den scoth í Fidsí, ach mar gheall ar an gclár ama a bhí acu, tá an-seans nach mbainfidh siad na cluichí ceathrú ceannais amach.
Ar an lámh eile de, tá sos breá fada ag Éirinn idir na cluichí dúshlánacha atá acu, chomh maith le doimhneacht foirne b’fhéidir nach bhfuil ag Fidsí.
D’fhéadfadh na 15 imreoir is fearr ar domhan a bheith agat — ach mura bhfuil ionadaí an duine agat dóibh nó fuinneamh aisteach acu, níl seans ar bith go mbuafaidh tú an comórtas.
