Tháinig Aindriú Ó Murchú agus Feargal Chambers aníos leis an smaoineamh don ghrúdlann Four Provinces sé bliana ó shin i dteach Aindriú. Bunaíodh an comhlacht faoi chomhúinéireacht na beirte, agus ceithre bliana ina dhiaidh sin, d’oscail siad an ghrúdlann.
A bhfiontar is déanaí ná an teach tábhairne Four Provinces, a osclaíodh i mí an Mhárta san áit a mbíodh an Black Horse Inn i gCamaigh, a dúnadh cúig bliana ó shin.
“Theastaigh uainn ár gcuideachta ghrúdaireachta féin a thosú. Bhí cúrsa déanta ag Aindriú sa ghrúdaireacht agus sa driogaireacht, agus bhí mé ar tí an cúrsa a rinne sé a dhéanamh ach níor bhac mé leis ar deireadh. Thosaigh muid as sin!” a dúirt Feargal.
Tá an bhrandáil a bhí ag an Black Horse Inn fós ar fhuinneoga agus scátháin an tí tábhairne, a mheabhródh an tseanáit, a raibh an oiread sin grá acu uirthi, do mhuintir na háite.
Agus muid ag amharc timpeall ar an décor chlasaicigh, labhair Feargal le beirt sheanóirí rialta, agus dúirt sé linn go raibh siad ag teacht chuig an Black Horse ó bhí siad ocht mbliana déag d’aois agus cé chomh sásta is atá siad gur osclaíodh arís é mar The Four Provinces.
“Ceapaim go bhfuil táirge iontach againn leis an teach tábhairne, is eispéireas uathúil é i ndeisceart Bhaile Átha Cliath, chomh maith le bheith ina theach tábhairne do mhuintir na háite” a dúirt sé.
Tá Aindriú agus Feargal an-sásta nach nead ólacháin amháin atá sa teach tábhairne, ach “speictream mór rudaí difriúla” é. Tá siad thar a bheith díograiseach faoin gcultúr Gaelach agus faoin teanga, agus cúrsaí déanta ag Feargal le Gaelchultúr.
“Tá an Ghaeilge mar chuid lárnach dár gcreideamh agus dár gcultúr anseo sa chuideachta. Ceiliúrann gach beoir ár gcultúr, ba é sin ár n-aidhm ón tús. Tá Gaeilge againn ar gach ceann dár gcannaí agus tá an fhoireann go léir dátheangach sa teach tábhairne. Tá go leor cainteoirí Gaeilge timpeall anseo, agus is féidir leo teacht isteach agus comhrá a dhéanamh as Gaeilge,” a dúirt Feargal.
Dúirt Aindriú nach bhfuil “gach duine sa teach tábhairne go huile is go hiomlán líofa” ach go measann sé go bhfuil sé sin “tábhachtach”.
“Tá foghlaimeoirí ann, tá daoine atá ag an meánleibhéal agus tá cainteoirí líofa ann, mar sin tá meascán maith anseo,” a dúirt sé.
Tá réimse leathan beoracha ag Four Provinces a dhéantar sa ghrúdlann in aice láimhe, gach ceann acu le huisce Chamaí. Tá fiú lágar ann darb ainm Poddle, a ainmníodh as an bPoitéal, abhainn a shníonn tríd an gceantar.
Tá Four Provinces bródúil as táirgí Éireannacha a stocáil, agus cuireann an bainisteoir, Ross Geraghty, Micil Gin, ó Chois Fharraige, agus uisce tonach Poachers ó Chill Mhantáin os ár gcomhair go fonnmhar.
“Déanaimid iarracht gan ach táirgí Éireannacha a úsáid nuair is féidir linn, agus tacaíocht a thabhairt do gnólachtaí áitiúla,” a dúirt sé.
Gné shainiúil eile den teach tábhairne ná go bhfuil sé oiriúnach do mhadraí, agus tá comórtas ‘Madra na Míosa’ ann.
“Tá neart daoine ann a thugann isteach madraí; tá babhla beag madraí agus sneaiceanna againn do na madraí,” a dúirt Feargal.
Beidh beoir Four Provinces le dáileadh ar fud na tíre sna míonna atá amach romhainn agus tá súil ag an teach tábhairne go mbeidh gean air ag muintir na hÉireann, Gaeilgeoirí agus turasóirí.
