An bhfuil sé i gceist ag na méain shóisialta mná a scriosadh?
B’fhéidir go bhfuaimníonn sé sin seafóideach ach de réir Laura Bates, údar an leabhair Everyday Sexism, an fhírinne atá ann. Feimineach láidir glórmhar í Laura Bates. Tá ocht leabhar scríofa aici a phléann den chuid is mó an gnéasachas atá forleathan inár sochaí. Maíonn Bates go bhfuil gnéasachas le brath sna meáin agus déanann sí éacht é sin a léiriú ina leabhar nuafhoilsithe The New Age of Sexism.
Míníonn Bates cad é gnéasachas ina cuid leabhar agus conas is féidir linn ar fad stad a chur leis. An aidhm atá ag Laura ná daoine a chur ar an eolas faoi na hionsaithe a dhéantar ar, agus an drochíde agus an dímheas a léirítear ar mhná. Bhunaigh Bates an suíomh Everyday Sexism in 2013, áit a roinneann mná a gcuid scéalta pearsanta faoin ngnéasachas a bhí orthu a sheasamh lá i ndiaidh lae. Níor thóg sé ach dhá bhliain don suíomh 100,000 iontráil a shroicheadh agus na scéalta uafásach, lán le brón agus gortú.
Teachtaireacht an tsuímh ná, trí scéalta a roinnt, tá mná ag léiriú don domhan gurb ann don chlaonadh inscne, go mbíonn mná ag fulaingt leis agus gur fadhb bhailí í lena plé.
Conas atá seo bainteach leis na meáin shóisialta?
D’fhoilsigh Laura Bates a leabhar nua The New Age of Sexism ar an 8 Bealtaine. Tugadh idir mholtaí agus cháineadh don leabhar ar a fhoilsiú. Tá an-éileamh ar a cuid leabhar agus ní eisceacht é an ceann nua seo ach oiread.
Sa leabhar seo, labhraíonn Bates faoi cad é mar atá cúrsaí faoi láthair. Mhínigh sí go bhfuil na meáin shóisialta agus an t-idirlíon, amhail TikTok agus PornHub, ag déanamh dochar do-athraithe d’aigne cailíní agus buachaillí óga sa lá atá inniu ann.
Cuireann Bates staitisticí dochreidte faoi bhráid an léitheora i dtaca leis an algartam ar TikTok. De réir an taighde atá déanta ag Bates agus í ag ullmhú don leabhar seo, nuair a osclaítear cuntas nua TikTok le hainm buachalla idir 12-18 mbliana d’aois, ní thógann sé ach 15-30 nóiméad ar an algartam ábhar gnéasach foréigneach in aghaidh mná a thaispeáint don úsáideoir.
Tá an gnéasachas sna meáin ag scaipeadh níos tapa ná riamh le feachtais ar TikTok atá bunaithe ar fhuath agus ar ghráin amháin. Feachtais a chuireann chun cinn tuairimí gránna faoi mhná.
Déanann an fhuathchaint agus an t-iompar gráiniúil seo dochar do gach duine, ní mná amháin. Tá tionchar ollmhór aige seo ar an bpobal ar fad. Tá an ‘Eipidéim Uaigneas Fireann’ go mór i mbéal an phobail ach ní phléitear seo i gcónaí mar fhadhb d’fhir, ach fadhb atá cruthaithe ag mná ar an ábhar nach nglacfaidh siad le dímheas agus gnéasachas laethúil. Úsáidtear an eipidéim seo i gcoinne na mban in áit ar son na bhfear.
Mar thoradh ar an gcaint ghránna ar líne tá ‘Deepfakes’ gnéasacha atá á scaipeadh ag fir. Is éard atá i gceist le ‘Deepfake’ ná pictiúr is féidir a chruthú le hintleacht shaorga. Tá na mílte tuairiscí ann go n-úsáideann buachaillí óga sna déaga na bogearraí seo chun pictiúir ghnéasúla a chruthú de chailíní ionas go gcuirtear náire orthu. Anuas ar an treocht nua seo, níl mná ag iarraidh caint le fir nach bhfuil aithne acu orthu óir tá eagla orthu go ndéanfaí ‘Deepfake’ nó níos measa orthu.
Tá sé soiléir go bhfuil fadhb ollmhór inár sochaí le gnéasachas agus foréigean in aghaidh mná. Tá an t-ábhar á phlé sna meáin, i leabhair Laura Bates mar shampla, nó sa chlár teilifíse ‘Adolescence’ a thaispeánann cé chomh furasta agus atá sé dul i bhfeidhm ar intinn déagóra. Faraor, tá na meáin shóisialta agus aipeanna as a mbaineann déagóirí feidhm gach lá ag nochtadh ábhar gnéasach le gach smeach a mbuailtear an scáileán fón leis. Táim den tuairim go bhfuil sé in am an ruaig a chur ar an ghnéasachas as an tsochaí agus as na meáin shóisialta. Nimh sa tsochaí is ea an gnéasachas, ní fada uainn an leigheas má thagaimid le chéile.
