Is deacair a chreidiúint go bhfuil 2022 buailte linn faoi dheireadh, agus ciallaíonn sé sin go bhfuil mé leath slí trí mo scoláireacht Fulbright. Is deacair a chreidiúint go bhfuil an pointe seo sroichte agam cheana féin, d’imigh briseadh na Nollag iontach tapa Bhain mé an sult as an Nollaig anseo sna Stáit Aontaithe, agus thug mé faoi deara go bhfuil cúpla rud eile atáim ag iarraidh a bhaint amach sula bhfuil orm dul abhaile sa samhradh. Agus mé ar coraintín de bharr an coróinvíris (athbhliain faoi mhaise dom féin!), chaith mé súil siar ar na himeachtaí agus na heispéiris a sheas amach domsa go dtí seo, agus mé ag tnúth go mór leis an aistear atá fós romham amach anseo.
Traenáil le Hartford GAA na nÓg – Bhí mé iontach neirbhíseach nuair a tháinig mé amach anseo mar ní raibh taithí agam bheith in áit nua le haghaidh tréimhse chomh fada seo. Ach nuair a thosaigh mé ag traenáil leis na cailíní agus buachaillí i Hartford GAA, bhí mé iontach sásta dul agus cabhrú le daoine óga taithí dhearfach a fháil le cuid lárnach de chultúr na hÉireann.
Nua Eabhrac, Chicago, South Bend, Burlington – Tá an t-ádh dearg orm go bhfuilim tar éis taisteal go háiteanna éagsúla timpeall na tíre go dtí seo, agus tá an liosta seo ag fás chuile lá. D’fhoghlaim mé go leor maidir le cultúr Mheiriceá agus an ról lárnach atá ag an teaghlach dóibh siúd ar bhuail mé leo agus mé ag taisteal. Chomh maith leis sin, bhíos i mo thurasóir ceart ag baint sult as bheith in áiteanna nua.
Obair na hOllscoile – Bhí an seimeastar seo caite ar fheabhas mar thaithí bheith ag obair in ollscoil anseo sna Stáit Aontaithe agus ní athródh mé aon rud. D’fhoghlaim mé go leor maidir le bheith ag obair le mic léinn, comhghleacaithe agus daoine sa phobal atá ag iarraidh an Ghaeilge a chur chun cinn agus ag súil le tionscnaimh nua san athbhliain leo uilig. Bhí sé go deas spéis na mac léinn a fhorbairt sa teanga agus sa chultúr. Chomh maith leis sin, bhí taithí agam ranganna a thógáil chun tuiscint níos fearr a fháil ar chultúr na mBundúchasach agus daoine bodhra, taithí den scoth bheith mar mhac léinn in ollscoil i Meiriceá. Níor shíl mé riamh go mbeadh deis mar sin faighte agam agus bhí sé suimiúil comparáid a dhéanamh idir na ranganna a bhí agam in Éirinn agus na ranganna thall anseo.
Lá Nollag i Syracuse – Bhí sé iontach deacair bheith fada ón mbaile den chéad uair don Nollaig, ach bhí an t-ádh orm Lá Nollag a chaitheamh in áit álainn lán sneachta. Buíochas le FaceTime, bhí mé in ann mo bhronntanais a oscailt le mo mhuintir sa bhaile, agus iad ag roinnt bronntanas ó Dhaidí na Nollag liomsa.
Seimeastar a Dó – Le cúnamh Dé, beidh an seimeastar seo lán le himeachtaí agus turais go Houston, Washington DC, Orlando agus St. Louis. Tiocfaidh fás agus forbairt ar an gCumann Gaelach anseo agus beidh mé ag súil go mór le tuilleadh traenáil a dhéanamh le Hartford. Maidir leis na ranganna Gaeilge, fan go bhfeice sibh na mic léinn atá a bheidh lán go béal Gaeilge agus atá chun dul ag tóraíocht i gcultúr na hÉireann. Tá go leor ag teacht ó UConn, coinnigh súil orainn!
