An Práta Éireannach
Leid: ní prátaí iad!

Ar mo chéad lá in Philadelphia, theastaigh uaim cupán tae a dhéanamh, ach in áit bainne tugadh creamer dom agus in áit siúcra, rogha idir Splenda nó táirge ionaid eile!

Má thug tú cuairt ar Mheiriceá riamh tuigeann tú nach mar a shíltear a bhítear anseo.

Mar sin cén t-ionadh dom é go gcruthaítear táirge darb ainm Irish Potatoes anseo in Philadelphia, agus ní hamháin nach prátaí iad, níl siad Éireannach ach an oiread.

Nuair a d’fhoghlaim mé gur cineál de mhilseán é, bhí mé ag súil le ceann a thriall, ach nuair a léigh mé faoin oideas ní raibh mé chomh tógtha leis.

Meascán de cháis uachtair, cnó cócó, agus an-chuid siúcra atá sa lár. Déantar liathróidí beaga bána as an meascán agus ansin rolláiltear i bpúdar cainéil iad.

Tá oideas ann a bhfuil práta istigh ann ach níl a fhios agam an ndéanann sé sin an scéal aon phioc níos fearr.

In amanta freisin, cuirtear cnónna sa mheascán mar ‘súil práta’.

Ní léir cé a chéadchum an t-uafás seo ach tá siad thart ar 50 bliain ar an bhfód, rud a ciallaíonn gur seantraidisiún anseo é.

Ar ábhar an phráta — feictear chomh maith go bhfuil milseog eile timpeall na Stát ainmnithe as an bpráta. Is léir gur nós anseo é!

Cé nach féidir liom an cosúlacht a fheiceáil i ndáiríre sa cheann seo:

Ach ag filleadh ar Philly, ar do son a léitheora, bhain mé triall as ‘Práta Éireannach’, ceann a rinne mac léinn de mo chuid lena lámha féin anseo san ollscoil.

Cé go raibh amhras orm ar dtús — thaitin siad go mór liom agus d’ith mé an-chuid díobh!

Is féidir neart scéalta deasa faoi bhunús na milseog seo a léamh ar líne, agus déantar amach gur Éireannaigh a chéadchruthaigh iad agus araile…ach níl fianaise ar bith ag gabháil leo.

Mar sin glacaimis leis gur cruthaíodh an mhilseog, ainmníodh as an bpráta é toisc an chuma atá orthu, agus gur caitheadh ‘Éireannach’ isteach toisc go bhfuil Philadelphia ar chósta thoir Mheiriceá!

Maíonn an comhlacht Oh Ryan’s go bhfuil na milseoga á ndéanamh acu chomh fada siar le 1989, agus go gcruthaíonn siad 80,000 punt idir Eanáir agus Márta gach bliain.