Na cúig áit is fearr chun snámh iontu i gContae na Gaillimhe

Tá sé ina fhómhar arís agus an tonn teasa curtha dínn ach ní hin le rá nach mbeidh muintir chróga na hÉireann ag tarraingt ar na tránna áille atá fud fad na tíre le n-iad féin a thumadh sa sáile agus iad sa tóir ar fhaoiseamh na farraige sna seachtainí amach romhainn. Má bheidh tú féin agus do bhicíní ina measc, agus más i gContae na Gaillimhe a bheidh tú, ofrálaim anseo duit mo mholtaí maidir leis na háiteanna is fearr chun snámh iontu sa chontae. 

Uimhir a cúig: An Charraig Dhubh, Bóthar na Trá 

Is bríomhar agus breá an snámh a gheobhaidh tú i mBóthar na Trá agus más é sruth aidréanailín atá uait, is deacair an léim ó na cláir thumtha a bhualadh. B’fhéidir go gcuirfidh sé iontas ar chuid de léitheoirí NÓS go bhfágaim an suíomh cáiliúil seo ag uimhir a cúig ar an liosta ach toisc go bhfuil teacht éasca ar an gCarraig Dhubh ón gcathair, is minic an áit a bheith dubh le daoine. Mar sin ar lá breá, seans go mbeidh ort fanacht tamall le do dheis a thapú chun léime! 

Rud eile faoin gCarraig Dhubh ar fiú a bheith ar an eolas faoi ná go bhfuil difríocht shuntasach le brath san uisce. Mar gheall ar an méid mór fionnuisce a ritheann ón gCoirib isteach go Cuan na Gaillimhe, níl an bhuacacht chéanna i mBóthar na Trá agus mar a bheadh san fharraige de ghnáth toisc níos lú salann a bheith inti. Mar sin ní mór dó shnámhaithe a bheith rud beag níos cúramaí anseo agus gan snámh ann mura bhfuil garda tarrthála i láthair. 

Uimhir a ceathair: Trá na gCeann, Bearna

(Íomha: Visit Galway)

Tá Trá na gCeann suite idir Bóthar na Trá agus Bearna agus fuair sé an lámh in uachtar ar an gCarraig Dhubh ar mo liosta mar gheall go bhfuil níos mó gainimh ar Thrá na gCeann ná na spotaí snámha eile i nGaillimh. Ciallaíonn sé seo go bhfuil sé níos deise chun do thuáille a leagan anuas ann, ach níos mó ná sin, súnn an gaineamh an teas isteach i rith an lae agus má fhanann tú go mbeidh an taoide lán um thráthnóna, beidh an fharraige féin níos teo le tú féin a thumadh inti. 

Uimhir a trí: Trá an Dóilín, an Cheathrú Rua

Tá suaimhneas speisialta le brath ag an trá coiréalach seo i gcroílár Ghaeltacht Chonamara. Is fiú go mór an tiomáint siar chuig an gCeathrú Rua chun snámh san uisce gléghlan seo. Le bheith cruinn beacht faoi, is gairbhéal bithghineach atá sa trá seo seachas coiréal agus is uathúil an tírdhreach a chruthaíonn siad ag Trá an Dóilín. Mar sin féin, bíonn siad dian ar na cosa! Bí cinnte do flip-fleapanna a thabhairt leat don aistear gearr ón gcarrchlós chuig an uisce. 

Uimhir a dó: Poll na bPéist, Árainn 

Tá an linn snámha nádúrtha seo ar na radharcanna is cáiliúla ar Árainn, ní nach ionadh. Líontar an linn dhraíochtúil ó thollán faoin talamh agus ó na tonnta móra a thagann isteach ón Atlantach. Is eisceachtúil an snámh agus an radharc é ach bí cinnte go bhfágann tú do dhóthain ama chun taisteal ann agus filleadh má bheidh tú ag súil leis an mbád a fháil tráthnóna. Tá an poll suite ar na haillte i gCill Mhuirbhigh, níos mó ná ocht gciliméadar ón gcéibh i gCill Rónáin. 

Uimhir a haon: Iomaí, Baile na hInse

Is seoid í Iomaí nach raibh cloiste agam féin fúithi go dtí le déanaí fiú. 15 chiliméadar siar ón gClochán, is anseo a bheidh an snámh is fionnuaire, fuinniúla agat i gContae na Gaillimhe ar fad. Cuid de dhraíocht an oileáin seo ná nach mbíonn fáil air ach amháin ag lag trá, nuair is féidir siúil nó fiú tiomáint thar an ngaineamh leis an oileán a bhaint amach (eispéireas ann féin, gan trácht ar an snámh!). Tá rogha cladach ar an oileán chun snámh iontu agus is spota snorclála den scoth é leis. Cuir glaoch ar shiopa Sweeney’s ar an gCladach Dubh chun an t-eolas is cruinne a fháil i dtaobh na dtaoidí sula mbuaileann tú bóthar, tabhair leat picnic bheag agus bíodh snámh aoibhinn agat sa tearmann síochánta seo.