Ba cheart d’éinne a dtaitníonn snámh leo turas a thabhairt ar Ghleann Beithe agus Ros Beithe an samhradh seo. Táid seo buailte ar phríomhbhóthar an N71 – aka Mór-Chuaird Chiarraí!
Ní féidir Óstán na Towers a shárú. Tá cuid des na seomraí athchóirithe acu le déanaí agus leapacha thuas thíos do leanaí iontu, mar aon le leaba dhúbailte. Ina theannta san, tá cistinín beag ann, a bhfuil cuisneoir agus spás chun bia a ullmhú ann mar aon le plátaí agus babhlaí agus araile.
Cuirtear fáilte ann roimh mhadraí chomh maith, agus tá doras amach go dtí an gairdín ag na seomraí ina dtógtar na gadhair. Tá biachlár ana-fhairsing ag an Towers agus tarrac ar spás chun ithe istigh agus amuigh. Tá botháin bheaga ar chruth tithe acu leis, ina bhfuil fuinneoigín atá dealraitheach le ceann a bheadh i dtigín ceann tuí.
Ar chraiceann do chluaise, ná fág an áit gan dul ag snámh ar Thráigh Ros Beithe. Bíonn ráiseanna capall ar an dtráigh seo de ghnáth. Tráigh mhór fhada is ea í, agus má shroicheann tú a deireadh ag siúl, beidh Tráigh Inse in Oirthear Duibhneach trasna na farraige uait. Tá an t-uisce i Ros Beithe níos teo ná aon áit eile a rabhas féin ag snámh ann in Éirinn cheana.
Ina dhiaidh sin, is féidir leat do scíth a ligint agus cupán caifé a ól i dtábhairne mhuintir Shúilleabháin, Ross Point.
An oíche sin, ith do ghreim in Óstán na Towers. Tá píotsaí saor ó ghlútan acu agus rogha eile do bhia a bhfuil blas an bhaile air. Tá Gaolainn agus fáilte ar fáil ós na cailíní a chríochnaigh an Ardteist i mbliana i gColáiste Íde in Iarthar Duibhneach, atá buailte fúthu sa dúthaigh don samhradh agus ana-chraic iontu!
An lá arna mháireach, téir ag siúl tríd an gcoill trasna na habhann ón óstán, ar an seana-iarnród a bhíodh ann fadó idir an Fearann Fuar agus Cuan Dhairbhre. Is anseo a thosnóidh Bealach Glas Uíbh Ráthaigh má cheadaítear é agus beidh sé go hálainn.
Tá an choill chomh ciúin, chomh suaimhneach, chomh glas. Tá siúlóid síog leis ann dos na leanaí, atá níos giorra, (tosnaíonn seo níos cóngaraí do Thráigh Ros Beithe ar thaobh an phríomhbhóthair chun na trá) agus doirse beaga daite na gcréatúr beag breactha timpeall na coille, mar a bhfuil ceolta sí le clos id chluais.
Nuair a thiocfaidh tú go dtí deireadh an chosáin, tá trucailín bídh ann le caifé ana-dheas ar fáil, mar aon le milseoga agus uachtar reoite. Is ó bhácús nua i gCiarraí Wild Sage a thagann na mílseoga. Ná téidís gan ithe!
Molaim go hard na spéire an turas taitneamhach lae seo, go háirithe do dhaoine atá b’fhéidir uair a chloig nó dhó ó bhaile ó Ghleann Beithe.
