An aithneofá Cáit de Poire agus Táilliúr Ní Fhuada? Tá aip dó sin ann!

Cáit de Poire, Críostir Mac Raghnaill, Éamonn Ó Síoráin, Táilliúir Ní Fhuada, agus Dónal Mac Giolla Bhrátha. 

Is dóigh nach n-aithneofá na hainmneacha sin ar an gcéad radharc, ach is leaganacha Gaeilge iad de mhórphearsana an domhain, curtha ar fáil ag an draoi ríomhairí Kevin Scannell. Dá mba i Ros Muc a bheadh Katy Perry agus Cristiano Ronaldo, nó i nGaoth Dobhair a chónódh Ed Sheeran agus T-Swizz sin iad na hainmneacha a bheadh orthu, agus cé go dtugtar ‘An Trumpach’ ar Donald Trump, is amhlaidh gur ‘Mac Giolla Bhrátha’ an sloinne ceart Gaeilge a bheadh air. 

Tá inneall nua — ‘Gaelaigh mé!’— cruthaithe ag an ollamh in Ollscoil Missouri a chuireann leaganacha dlisteanacha Gaeilge agus Gaelaithe ar fáil d’ainmneacha Béarla agus Galldaithe. Is féidir ainm ar bith a chur isteach san inneall nua, a foilsíodh inné ar shuíomh idirlín Kevin, cadhan.com, agus déanfar iarracht leagan Gaeilge den ainm sin a sholáthar. 

Anuas air sin, tá “liosta ceiliúrán” ar an suíomh agus leaganacha Gaelaithe d’ainmneacha ar nós Justin Bieber (Saebhreathach Béabhar), Bill Gates (Liam de Gheata), Helen Keller (Léan Ní Chéileachair) agus Beyoncé Knowles (Beyoncé Ní Thnúthail) le fáil ann. 

Is minic a bhíonn fonn ar fhoghlaimeoirí Gaeilge leagan Gaelach dá n-ainm a aimsiú agus is mór an chabhair a bheidh san uirlis nua seo ó Kevin Scannell chuige sin. Cabhróidh sé, freisin, le daoine an litriú ceart ar a n-ainm nó a sloinne a aimsiú. 

“Is bunachar sonraí simplí atá ann a bhfuil na hainmneacha agus na sloinnte is coitianta ó fhoinsí éagsúla. Chruthaigh mé an bunachar ag an deireadh seachtaine agus ansin scríobh mé cód a láimhseálann na leaganacha firinscneacha agus baininscneacha, agus leaganacha pósta agus araile,” a mhínigh Kevin do NÓS. 

Ar na foinsí a d’úsáid sé leis an uirlis a chruthú bhí na leabhair An Sloinnteoir Gaeilge agus an tAinmneoir, Sloinnte Gaedheal is Gall, agus English-Irish Dictionary de Bhaldraithe. Chomh maith leis sin tá eolas ó Innéacs Sloinnte Éireannacha Dúchas.ie, ón bPríomhoifig Staidrimh, agus ón Vicipéid. 

“Tá mé ag obair le Wikidata faoiláthair, ag iarraidh mórán sonraí Gaeilge a chur leis, agus amach anseo Vicipéid na Gaeilge a leathnú. Mar chuid den obair sin, bhí mé ag iarraidh ainmneacha cearta Gaeilge a chur ar haoine nuair a bhí a leithéid ann agus in úsáid. Sin an fáth ar scríobh mé an script i dtús báire. Tá timpeall is milliún iontráil á nuashonrú faoi láthair — tógfaidh sé cúpla seachtain!

“Tá mé ag iarraidh ainmneacha sa gcorpas atá agam a cheangal le hiontrálacha Wikidata, agus dá bharr sin tá sé tábhachtach ‘Bertie Ahern’ a cheangal le ‘Parthalán Ó hEachthairn agus araile. Nuair a bhí an cód sin críochnaithe bhí sé sách éasca é a chur suas ar mo shuíomh, agus ligean do dhaoine eile é a úsáid,” a dúirt Kevin le NÓS. 

Mar sin, Gaelaigh tú féin!