Mar a bheadh cleas draíochta ann, tá bolgán cruthaithe ag an dearthóir Simon Morris a ritheann ar chumhacht a thagann ón aer.
Is ea, an t-aer!
Slán le sreangacha leictreachais agus slán le ceallraí! Déantar an bolgán nuálach seo, Flyte, a chumhachtú trí ionduchtú maighnéadach ón aer.
Agus é lasta, tá an chuma ar Flyte go bhfuil sé ar foluain san aer.
Bíonn sé suite os cionn píosa adhmaid cearnógach a shuíonn ar an talamh nó ar bhord.
Deirtear nach mbrisfidh an bolgán má thiteann sé ón aer agus go bhfuil LED ann a ritheann ar fhuinneamh íseal le go mairfidh sé tamall fada.
Maítear ar shuíomh gréasáin Flyte go mairfidh an solas níos mó ná 50,000 uair an chloig – sin breis agus 11 bhliain agus an solas ar siúl ar feadh 12 uair an chloig sa lá!
Ar $349 an ceann, seans gur margadh maith é.
Anuas ar an solas féin, tagann cumhacht ón bhun adhmaid a mbíonn an bolgán ar foluain os a chionn.
Feidhmíonn an bun adhmaid, mar sin, mar stáisiún luchtaithe do do ghuthán agus do ghléasanna eile fosta.
Tá cúlra eolaíochta agus ealaíne ag Simon Morris, atá ag cur faoi i Nua-Eabhrac.
Agus an sciorrárthach (hovercraft) mar inspioráid dó, tháinig Flyte ar an saol tar éis feachtas rathúil Kickstarter a tharraing breis agus $600,000.
D’eascair an togra ón spéis atá ag Simon i gcúrsaí fuinnimh agus damhna. Bíonn sé fiosrach faoin tionchar a imríonn domhantarraingt (gravity) agus dímheáchan (weightlessness) orthu.
“Ceann de na brionglóidí is coitianta a bhíonn ag daoine ná a bheith ag eitilt. Sílim go bhfuil muid gafa leis an choincheap a bheith saor ó shrianta na domhantarraingthe,” ar sé.
