Tá comhairle baile san Eilvéis ar tí glacadh leis an airgeadra digiteach Bitcoin le haghaidh íocaíochtaí áirithe dá seirbhísí poiblí.
Tosóidh an scéim phíolótach sa bhaile Zug ar 1 Iúil agus leanfaidh sé ar aghaidh go deireadh na bliana.
Beidh cónaitheoirí in ann suimeanna suas le 200 Franc Eilvéiseach (€180) a íoc leis an chriptea-airgeadra.
Ní airgead fisiciúil é Bitcoin ach dearbháin dhigiteacha atá á dtrádáil ar líne ó bhí 2009 ann.
Tá go leor comhlachtaí Bitcoin lonnaithe i gceantar Zug agus chuige sin tá cinneadh déanta ag comhairle an bhaile ligean do dhaoine íoc as seirbhísí na comhairle leis an ríomh-airgeadra.
“Samhlaím go mbeidh tú in ann do bhille cánach a íoc le Bitcoin amach anseo,” arsa Méara Zug, Dolfi Mueller.
Má éiríonn go maith leis an scéim i mbliana tá sé i gceist acu an cur chuige a leathnú amach chuig seirbhísí eile rialtais.
In 2014 seoladh criptea-airgeadra Éireannach darb ainm Gaelcoin ach tuigtear nach bhfuil sé á thrádáil a thuilleadh.
