Tá deireadh le Twitter mar “ardán saibhir taighde agus forbartha” don Ghaeilge mar gheall ar ghníomhartha Elon Musk, dar leis an Ollamh Kevin Scannell ó Ollscoil Missouri. Tá cáil nach beag ar Kevin as an obair mhór atá déanta aige ar son na Gaeilge ar an idirlíon agus tá carnán taighde déanta aige le breis agus deich mbliana anuas ar úsáid na Gaeilge ar an suíomh.
Dúirt Kevin le NÓS go bhfuil “díomá” air faoi na hathruithe a cuireadh i bhfeidhm ar Twitter ó ghlac Elon Musk seilbh ar an ardán anuraidh agus nach féidir aon eolas nua a bhailiú ón suíomh anois le haghaidh a thograí Indigenous Tweets agus chuala.me. Beidh tionchar ag na hathruithe ar an suíomh ‘Treochtaí’ freisin ó tharla gurbh é Twitter an “foinse bheo” ba mhó ba thábhachtaí don suíomh sin.
Bhí taifead ann ar Indigenous Tweets d’úsáid na Gaeilge chomh maith leis an iliomad mionteangacha eile ar Twitter agus chuirtí na scéalta ba mhó i mbéal an phobail Gaeilge ar Twitter in aon liosta amháin ar an suíomh chuala.me. Úsáideann Treochtaí ábhar ó “gach áit ar an idirlíon” le húsáid focal a chur i gcomparáid le chéile agus tá an suíomh sin fós ann ach gan go leor sonraí ar fáil anois.
“Tá na sonraí ar Indigenous Tweets cothrom le dáta trí dheireadh mhí an Mhárta 2023. Tá taifead de 4.92 milliún giolc ann san iomlán agus ba iad @ToghCon (221,000) agus @aonghusoha (205,000) na cuntais ba bhisiúla. Athghiolcacha a bhí sa chuid is mó den ábhar ó @ToghCon, agus mar sin ba é Aonghus Ó hAlmhain an duine ba ghníomhaí gan aon amhras. Gan athghiolcacha san áireamh scríobh sé beagnach 3,000,000 focal ar Twitter thar thréimhse 12 bliain. Tá thart ar 110,000 focal in Cré na Cille!” a dúirt Kevin le NÓS.
Tá go leor cainteoirí Gaeilge imithe nó leathimithe de Twitter ó ghlac Elon Musk seilbh ar an suíomh an bhliain seo caite, ach tráth dá raibh bhí giolcacha Gaeilge á bhfeiceáil ag 1,200,000 amlíne gach lá ar Twitter. Chuireadh os cionn 300 cuntas ábhar amach ar bhonn laethúil agus d’úsáid Kevin Scannell API Twitter, nach bhfuil ar fáil níos mó, le anailís a dhéanamh ar leantóirí na gcuntas sin.
Chuaigh roinnt daoine chuig an ardán Mastadon ag deireadh na bliana seo caite agus tá borradh beag faoi phobal na Gaeilge ar Bluesky, ach níl aon eolas ná anailís déanta ag Kevin Scannell ar na hardáin sin go fóill.
