‘Easpa bealaí spraíúla le Gaeilge a fhoghlaim’ a spreag aistritheoirí ‘AmongUs’

Ba é an “ganntanas cluichí [ríomhaireachta] i nGaeilge” agus “easpa bealaí spraíúla leis an nGaeilge a fhoghlaim” a spreag an ceathrar a chuir craiceann Gaeilge ar an gcluiche iomráiteach Among Us, a dúirt duine den fhoireann aistrithe, Cormac Cinnsealach, le NÓS. 

Eisíodh bunleagan Béarla Among Us sa bhliain 2018, cluiche ina mbíonn criú spásárthaigh ag obair as lámha a chéile le réimse tascanna a chur i gcrích sula maróidh an ‘fealltóir’ ina measc iad uilig, nó go dtí gur féidir leo an fealltóir céanna a aimsiú agus a dhíbirt den spásárthach. 

“Bhuel, is dóigh nach raibh mórán cluichí ar fáil i nGaeilge, agus déanta na fírinne níl aon rud ar fáil i nGaeilge, agus ba é sin a spreag muid leagan Gaeilge de chluiche a bhfuil an-tóir air a aistriú go Gaeilge. Ar a bharr sin, dúirt duine eile de na haistritheoirí, Mike Drinkwater gur thug sé faoi deara agus an Ghaeilge á foghlaim aige siúd nach raibh mórán áiseanna ar fáil le hí a fhoghlaim go héasca, go nádúrtha agus go spraíúil,” a dúirt Cormac. 

Dúirt Colm go raibh an t-aistriúchán éasca i gcomparáid leis an obair a bheadh i gceist le haistriú cluichí eile ach go raibh “dua” áirithe ag baint le haistriú Among Us mar sin féin.

“Rinneamar an-iarracht aistriúchán sách maith a dhéanamh, ach is í an fhadhb leis an aistriúchán seo ná go bhfuil nathanna sa nGaeilge an-fhada ar fad, níl sé cosúil leis an mBéarla ná an Rúisis agus ní raibh go leor spáis ann leis na nathanna a chur isteach sa chluiche ar dhóigh an n-oirfeadh don scáileán. Bhí orainn a bheith sách cruthaitheach agus d’éirigh linn, sílim. 

“Is éard a tharla ná gur shocraigh muid an t-aistriúchán seo mar mod i dtosach, ní raibh aon leagan oifigiúil den chluiche ann. Ansin, chuaigh Úna-Minh i dteagmháil leis an dream a rinne AmongUs ar Twitter, agus thug fear darbh ainm Callum Underwood ón gcomhlacht Robot Teddy tacaíocht agus cúnamh dúinn an t-aistriúchán a dhéanamh,” a dúirt sé. 

Ba iad Úna-Minh Caomhánach, pearsa meán sóisialta as Ciarraí; Brian C. Mac Giolla Mhuire, mac léinn PhD san Iorua; Mike Drinkwater, mac léinn na as an Nua-Shéalainn; agus Cormac Cinnsealach, mac léinn i gColáiste na Tríonóide, a chuir Gaeilge ar AmongUs.  

Is féidir an cluiche a íoslódáil ar an suíomh idirlín InnerSloth agus é a imirt le do chairde, nó seisiúin randamacha a aimsiú ar líne, agus is féidir do rogha teanga a roghnú agus imirt le Gaeilgeoirí amháin más mian leat.