Tá céim chun tosaigh eile tógtha ag Gmail ar lucht soláthair ríomhphost – agus iad ag druidim lena chúigiú breithlá, tá uirlis nua físchomhrá curtha ar fáil ag muintir Google.
Bhí Gmail mar cheannródaí na bhfreastálaithe rphost cúig bliana ó shin nuair a thosaíodar ar theachtaireachtaí daoine a stóráil ar an idirlíon seachas ar thiomántán líonra in áit ar leith.
Leis seo bhí sé de chumas ag daoine gigabhearta de theachtaireachtaí agus chomhaid a choimeád nuair nach raibh ach idir dhá mheigibheart agus cúig mheigibheart á thairiscint ag leithéidí Hotmail agus Yahoo a bhí ag obair ar an tsean-slí.
Do dhuine ar bith nach bhfuil teanga an ríomhairí aige, is ionann míle meigibheart agus gigabheart amháin, agus is ionann meigibheart amháin agus comha idir 1500 agus 2000 focal ar fhad.
I ndiaidh bliana nó mar sin bhí an córas nua rphost seo in úsáid ag Hotmail agus Yahoo toisc nach féidir paitinn a fháil ar aon rud a úsáideann HTML.
I mí Lúnasa 2006 sheol Gmail a n-uirlis nua comhrá. Anois bhí daoine a raibh cuntas Gmail acu in ann comhráití téacs a bheith acu, nó Gchomhrá (Gchat).
D’fhórbair sé seo ar an tslí chéanna le MSN, agus straoiseoga (emotions) ar fáil do lucht Gchomhrá gan mhoill. Bhí MSN ag barr an liosta go fóill ach bhí líon lucht Gchomhrá ag fás i gcónaí.
Idir an dá linn, d’éirigh nascanna idirlín níos sciopaí agus bhí sé ar ár gcumas níos mó eolais a sheoladh dá chéile. Agus níorbh fhada go raibh bealach ag úsádóirí Gmail leis an leathanbhanda seo a líonadh – Físchomhrá Gmail.
Tá sé soiléir dom láithreach go mbeadh sé seo an-tairbheach do lucht taistil an J1 agus víosaí oibre in áiteanna ar son na Stát Aontaithe agus na hAstráile.
Tá sé níos saoire ná glaoch gutháin, agus is féidir leat do chlann nó an cailín nó an buachaill sin ar fhág tú sa bhaile a fheiscint agus tú ar an taobh eile den domhan. Is é seo mar a shamhlaítear go n-úsáidfí é.
Go fírinneach bíonn an fhís soiléir go leor an chuid is mó den am, agus cé go n-éiríonn sé stadach, ní bac mór é toisc nach mbíonn an méid sin geáitsíochta ar siúl ag daoine os comhair ceamaraí gréasáin i gcaiféanna idirlín Melbourne nó San Francisco.
An fhadhb is mó ó thaobh chomhrá leanúnach de ná nuair a éiríonn an fhuaim stadach. Tagann canúintí róbait ar dhaoine agus iad ag screadaíl ar an ríomhaire ag ceapadh go gcabhróidh sé sin lena nguth a sheoladh chuig an taobh eile den domhan.
Seachas seo, mholfainn iarracht a bhaint as an bhfíschomrá a úsáid ach má theipeann air, bain úsáid as an gcomhrá fuaime agus déan dearmad ar an bhfíschomhrá go dtí go mbíonn leathanbhanda níos leithne ar fáil.
Cinnte tá gnáthphacáiste idirlín eircom agam féin agus ní hé an pacáiste is tapúla ar domhan, ach, ní fhéadfainn fiú ríomhphost le hiatán beag a sheoladh agus mé ag úsáid an fhíschomrá, rud a léiríonn an brú a chuireann sé ar an tseirbhís.
Mar sin, don am i láthair, mhollfainn do dhaoine fanacht lena leithéidí Skype nó fuaimchomhrá Gmail go gearrthéarmach. Is dócha nach bhfuil ‘an todhchaí’ tagtha chugainn go fóill ach is mór an spraoi gur féidir baint as más rud é nach bhfuil tú ag roinnt do leathanbhanda.
