Facebook, Twitter, Gmail… agus anois tá an Ghaeilge in airde ar Snapchat!
Den chéad uair riamh beidh snapairí as gach contae sa tír in ann scagairí tíreolaíochta, nó geo-scagaire, as Gaeilge a úsáid agus iad á seoladh an tseachtain seo ag Snapchat.
Íomhá atá sa gheo-scagaire a bhfuil téacs curtha leis chun tuilleadh eolais a thabhairt do leantóirí faoin áit ar domhan ina bhfuil tú.
An t-am seo anuraidh reáchtáil Conradh na Gaeilge feachtas GaelSnap, a thug deis d’úsáideoirí Snapchat ar fud na tíre a ngeo-scagaire ealaíonta féin a chruthú mar nach raibh siad ar fáil i nGaeilge.
Ag labhairt dó le NÓS, dúirt Aodán Ó Deá, Stiúrthóir Forbartha Chonradh na Gaeilge, gur glacadh le “ar a laghad” geo-scagaire Gaeilge amháin as gach contae go dtí seo.
“Tá siad á rolladh amach ón lá inniu agus tá muid ag súil go mbeadh siad ar fad beo ar Snapchat sna laethanta beaga amach romhainn,” ar sé.
Ó thaobh líon na n-úsáideoirí rialta de ar Snapchat, tá Éire i measc na dtíortha is mó ar domhan agus tá súil ag Conradh na Gaeilge go spreagfaidh an beart seo níos mó daoine lena gcuid Gaeilge a úsáid.
Dúirt Niall Comer, Uachtarán Chonradh na Gaeilge, gur iontach an rud é go raibh scagairí tíreolaíochta ar fáil d’úsáideoirí Snapchat in Éirinn anois agus ghabh sé buíochas le Snapchat agus leis na dearthóirí iontacha ar fud na tíre a thacaigh leis an iarracht.
Beidh scagairí tíreolaíochta Gaeilge Snapchat mar chuid de dhúshlán BÚAGaeilge na míosa seo, feachtas de chuid Chonradh na Gaeilge a spreagann daoine le Gaeilge a úsáid sa saol laethúil.
Más maith libh a bheith páirteach sa dúshlán is déanaí, tá breis eolais ar fáil anseo!
