Is é glór Dhomhnaill Mhic an tSíthigh an file, scríbhneoir, agus eachtraí aitheanta as Baile Eaglaise i gcontae Chiarraí a bheidh le cloisteáil ar chóras sintéise cainte Abair.ie.
D’fhógair an tOllamh Ailbhe Ní Chasaide gurb é glór Dhomhnaill a bheidh in úsáid do chanúint Chorca Dhuibhne ar an gcóras sintéise cainte atá á fhorbairt ag Abair.ie agus an suíomh nua á sheoladh aici ag Oireachtas na Samhna i gCill Airne tráthnóna.
Seoladh glór nua Connachtach darbh ainm ‘Sibéal’ ag an ócáid sa Bhálseomra in Óstán an Gleneagle inniu. Dúirt an tOllamh Ní Chasaide go raibh éileamh mór ar ghlór cailín as Connachta don sintéiseoir, a bhíonn agus a bheidh in úsáid i dteicneolaíocht a chabhróidh le daoine atá faoi mhíchumas, agus ar chórais dála ‘Alexa’ de chuid Amazon agus ‘Siri’ de chuid Apple.
Dúirt Ailbhe nach raibh lucht na saotharlainne urlabhra ag iarraidh go bhfágfaí aon chanúint ar lár agus go rabhthas ag obair anois le canúintí eile a chur ar fáil trí Abair.ie. Is í canúint Chorca Dhuibhne an chéad chanúint eile a chuirfear ar fáil agus is é glór Dhomhnaill a bheidh le cloisteáil.
Bhásaigh Domhnall Mac an tSíthigh (nó Danny Sheehy mar a thugtaí freisin air) gan choinne nuair a d’iompaigh tonn an naomhóg a raibh sé inti béal fúithi i mbéal na habhann Minho ar theorainn na Portaingéile leis an Spáinn ar 9 Meitheamh 2017.
Mhínigh an tOllamh Ní Chasaide go raibh a dhóthain ábhair cainte taifeadta ag Domhnall i gcaitheamh na mblianta leis an sintéiseoir a chruthú. Ba mhinic a bhí Domhnall le cloisteáil ar chláracha RTÉ Raidió na Gaeltachta agus ar TG4, i measc stáisiúin eile.
Is ag ócáid speisialta i mBaile an Fheirtéaraigh in earrach na bliana seo chugainn a sheolfar an sintéiseoir nua ar a mbeidh glór Dhomhnaill le cloisteáil.
Aithníodh Domhnall ar dhuine de na cainteoirí ba bhreátha i gCorca Dhuibhne, agus in Éirinn féin, agus bhí saineolas aige ar chaint a mhuintire in iarthar Duibhneach.
Tá obair ar bun ag lucht Abair.ie le blianta beaga anuas ar sheirbhísí sintéise cainte agus aithinte cainte a ghabhfaidh chun tairbhe phobal na Gaeilge sna blianta atá amach romhainn. Beidh na glórtha an sintéiseora in úsáid ar lear mór seirbhísí – táirgí dála Alexa agus Siri, léitheoirí suíomhanna gréasáin, agus ar uirlisí a thabharfaidh glór do dhaoine nach bhfuil a nglór féin acu.
