Má tá do ghlic-ghuthán curtha san aer agat riamh chun amhrán a aithint leis an aip mhóréilimh Shazam, níl tú i d’aonar.
Deir an comhlacht Sasanach go bhfuil thart ar 100 milliún duine ag úsáid an tsáis anois in aghaidh na míosa agus go n-eascraíonn 10% de dhíolachán digiteach ceoil, ar bhonn domhanda, ó Shazam.
Ní ionadh é mar sin gur fógraíodh inniu go bhfuil luach $1 billiún (€860m) ar an chomhlacht agus infheistíocht nua de €26m faighte acu ar na mallaibh.
Úsáideann Shazam teicneolaíocht aitheanta fuaime chun a rá leat cén t-amhrán lena bhfuil tú ag éisteacht agus, más amhrán eisithe é, ní thógann sé ach cúpla soicind chun an t-eolas a sholáthar.
Conas a dhéanann siad a gcuid airgid áfach?
Bhuel bíonn fógraíocht ar an aip go minic agus gach uair a leanann tú nasc chuig leithéidí iTunes, faigheann Shazam sciar den díolachán.
Tá siad tar éis tús a chur le tograí eile chomh maith a thugann poiblíocht do cheoltóir faoi leith nó a dhéanann ceangal le lipéad ceoil.
Coincheap simplí é atá tar éis aird na bhfathach idirlín Google agus Amazon a mhealladh agus iad anois ag bogadh i dtreo an cheoil digitigh.
Má leanann Shazam leis an tseiftiúlacht atá léirithe acu go dtí seo áfach, gach seans go gcoinneoidh siad chun tosaigh ar an fhreasúra agus gur féidir linn bheith ag súil lena thuilleadh fáis agus forbartha ón aip bheag ghorm sa tréimhse amach romhainn.
Anois, cad é an t-amhrán sin?