Agus an tOlltoghchán ag teannadh linn, beidh ar pholaiteoirí na tíre cúram sa bhreis a thógáil lena dtweetanna mar go bhfuil an ‘Deartháir Mór’ Politwoops ag coinneáil súil ghearr ar gach a bhfuil scríofa agus scriosta acu.
Is iomaí tweet a seoladh amach chuig an domhan mór a chothaigh trioblóid don té a chuir.
Tá tréan scéalta ann faoi dhaoine a chaill a bpoist nó a tharraing míchlú orthu féin mar gheall ar ghiolc beag bídeach.
Chuala muid ar fad caint faoin oibrí aineolach sin a chuir tweet gearánach amach ar Twitter ag tagairt do dhrochlá ar an obair, nó faoin duine drogallach nach raibh iomlán tógtha faoin phost a fuar siad agus gur tháinig deireadh tobann leis an phost céanna.
Thaitin an ceann seo liom!
Anuraidh, seans gur sheas tweetanna leis an cholúnaí Sasanach Kate Hopkins amach leo féin i measc na gceann ba mheasa ar Twitter in 2015.
Chothaigh tweet amháin léi stoirm d’aisfhreagra inár thagraigh sí do dhaoine a bhí ag teitheadh ó chogaidh mar chaoróga dubha.
Ach bíodh cinnte gur mhaith lena leithéidí Kate go dtarraingeofar aird ar a cuid tuairimí láidre míchuibheasacha.
Is amhlaidh i gcás an iarrthóra uachtaránachta Donald Trump i SAM ar ndóigh, fear na dtweetanna craiceáilte a bhfuil Kate féin go mór i bhfách leis.
Is leor sin le rá.
Cé gur cosúil gur dúil leis an bheirt úd scannal a thógáil, bíonn an gnáthpholaiteoir cúramach faoina gcuid teachtaireachtaí poiblí ar Twitter.
Léiriú is ea é Politwoops ar an mhéid sin.
Is éard atá i gceist le Politwoops ná bunachar de tweetanna a scríobhadh, agus a scriosadh, ag polaiteoirí tofa mar aon le hiarrthóirí toghcháin ar fud na cruinne.
Is féidir anois dul ag tochailt i mbunachair timpeall an domhain le fáil amach cad é nár mhaith le polaiteoirí go léifeá.
Téann an chartlann tweetanna ó mhéara pholaiteoirí na hÉireann – ar togra é de chuid Storyful – siar os cionn dhá bhliain chomh fada le tweet a chuir an Teachta Dála le Fine Gael, Jerry Buttimer, amach.
Tús leadránach agus is mar sin a leanann siad ar aghaidh.
Tá mé ag déanamh go bhfuil – nó go mbeidh – seoid i measc an leadráin ach tar éis spléachadh a chaitheamh ar os cionn 502 leathanach de tweetanna – agus an líon ag ardú i rith ama – níor tháinig mé ar a dhath a tharraingeodh droch-chlú ar an té a sheol.
Mílitriú nó drochphuncaíocht an bunús le go leor de na tweetanna scriosta, ar minic iad bainte ó Twitter taobh istigh den bhomaite céanna inár cuireadh in airde iad, mar atá thuas ag Buttimer.
20 soicind a thóg sé air a ghiolc a scriosadh agus tá sé sin, a bheag nó a mhór, ag teacht leis an mhórchuid acu.
Is spéisiúil go bhfuil giolcacha i nGaeilge leis na Teachtaí Dála Aodhán Ó Ríordáin agus Joe McHugh i measc na dtweetanna le háit a fháil sa chartlann poiblí.
Bhí nós aisteach go leor ag Aodán Ó Ríordáin tweetanna a bhaint óna chuntas go rialta, tar éis roinnt laethanta dóibh a bheith in airde.
Tá breis agus 18K giolc curtha ag an Aire Ó Ríordáin mar sin scaoilfidh muid leis cúpla ceann sa bhreis a ghlanadh.
Fear mór é Joe McHugh le haghaidh an ‘RT’ ach caithfidh nár mhian leis RT a thabhairt d’Údarás na Gaeltachta an uair seo!
Thuiginn cén fáth ar bheartaigh Noel Harrington an RT seo a bhaint aníos. As comhthéacs, tá cuma aisteach go leor air.
Agus seans gur bheartaigh Kieran O’Donnell póga móra a sheoladh amach chuig a lucht leanúna nó b’fhéidir go bhfuil cúis ciallmhar lena ghiolcacha randamacha – ag tweetáil ina phóca, nó an bhfuair páiste óg greim ar a ghuthán?!
Cá bhfios ach tá rud amháin cinnte, tá an ‘Deartháir Mór’ Politwoops ag cinntiú nach gcuirtear rud ar bith i bhfolach orainn… a pholaiteoirí, tá muid ag faire amach don tseoid!
