Beidh Gearóidín McEvoy linn arís don uair dheireanach i mbliana lena rang seachtainiúil ceardaíochta. Beidh sí ag múineadh dúinn conas carbhat cuachóige a fhuáil – do dhaoine nó do mhadraí!
“Inniu táimid chun carbhat cuachóige a fhuáil. Táim chun ceann Nollaigiúil a dhéanamh do mo mhadra, ach is féidir iad a dhéanamh do dhaoine chomh maith, d’aon ócáid! Tá siad an-éasca, níl uait ach inneall fuála, éadach, siosúr agus píosta leaistice. Is iontach an bronntanas é – déan ciarsúr póca a réiteodh leis más maith leat!” a dúirt Gearóidín.
Thosaigh Gearóidín ag tabhairt ranganna ceardaíochta ar Instagram NÓS nuair a tháinig na srianta Leibhéal 5 i bhfeidhm os cionn dhá mhí ó shin agus tá rang nua déanta aici uair sa tseachtain ó shin. Ó thosaigh sí, tá ceachtanna fuála agus cniotála tugtha aici saor in aisce do leantóirí NÓS ar Instagram. Is féidir breathnú siar ar gach uile rang a thug Gearóidín a fheiceáil ar IGTV na hirise.
Beidh rang na hoíche anocht ar siúl ar Instagram ag 17.30. Seo é rang deireanach na sraithe seo agus gabhann buíochas ó chroí le Gearóidín as na ranganna ar fad a chur ar fáil.
